برطانیہ اور جمائمہ کو ضمانتی بنانے کی کوششوں کا انکشاف، عمران خان کا سیاسی خاموشی سے انکار عمران خان کی سابقہ اہلیہ جمائمہ، ان کے بیٹوں اور برطانوی حکومت کو یہ ضمانت دینے پر آمادہ کرنے کی کوششیں جاری ہیں کہ اگر عمران خان کو برطانیہ بھیجا گیا تو وہ سیاسی بیان نہیں دیں گے، لیکن عمران خان نے اس پر آمادگی ظاہر نہیں کی؛ ڈان اخبار کی خبر

اسلام آباد (ڈیلی پریس کانفرنس اخبارتازہ ترین۔ 02 ستمبر 2026ء) پاکستان تحریک انصاف کے ایک رہنماء نے نام نہ ظاہر کرنے کی شرط پر انکشاف کیا ہے کہ پارٹی عمران خان سے ملاقات کی اجازت ملنے کی توقع کر رہی تھی لیکن ملاقات سے انکار کرکے پارٹی کو یہ واضح پیغام دے دیا گیا ہے کہ وہ یہ بھول جائیں کہ حالات بہتر ہو رہے ہیں۔ ڈان اخبار کے مطابق پی ٹی آئی کے رہنما کا کہنا تھا کہ جیل انتظامیہ اور حکام کے سخت رویئے کے باوجود عمران خان اپنے سیاسی موقف پر ڈٹے ہوئے ہیں، انہوں نے بتایا کہ بانی پی ٹی آئی نے واضح پیغام دیا ہے کہ اگر انہیں طبی بنیادوں پر ہسپتال بھی منتقل کر دیا جائے، تب بھی لانگ مارچ ہر صورت منعقد ہوگا۔